قصة فلسطين والجيش المصرى

[URL="http://up1.m5zn.com/photo/2009/1/31/08/5msrphdh1.jpg/jpg"]مشاهدة الصور[/URL]










وعلى صوت ام كلثوم فى الراديو


يالى مليت بالحب حياتى .. اهدى حياتى
اليك ..روحى.. قلبى ...عقلى ...حبى ...كلى ملك اديك


صوتك .. نظراتك .. همساتك.. شئ مش
معقول .. شئ خلى الدنيا زهوور على طول وشموع على طول


الله يا حبيبى على حبك وهنايا معاك الله الله .. ولا دمعت عين جرحت
قلبى ولا قولت اه .. اه اه مبقلش فى حبك غير الله الله الله .... الله يا حبيبى على حبك الله الله .. من
كتر الحب لقيتنى بحب .. لقيتنى بحب وادوب فى الحب


وادوب فى الحب وصبح وليل وليييل على بابه








الله الله على النغم المصرى
الاصيل ليش عم تجلس وحدك اخ احمد ليش ماعم
تنضم الينا فى ها الجلسة الحلوة








متعرفش قد ايه مصر وحشتنى متعرفش قد
ايه نفسى ارجع ابوس ترابها امشى فى شورعها اشوف امى واختى وابويا نفسى ارجع امسك
عود ابويا وادندن عليه وامى تقلى متحاولش مش هتعرف تعمل اللى عمله
ابوك ..ابوك ده مفيش زيه


نفسى ارجع اجوز اختى واشوفها سعيدة
فى بيتها امى وابويا ملهمش فى الدنيا دى
غيرى يا معتز











معتز/


اخى احمد انت ايه اللى خلاك تنضم
للجيش المصرى رغم انك مالك جيش ولا خدمة
عسكرية ايش اللى دفعك لكدة








احمد/


معتز مش معنى انى بقلك نفسى ارجع
بلدى وانى مشتاق ليها ان فلسطين كمان مش بلدى فلسطين ليا فيها زى ما ليك انت بالظبط يا معتز عارف انا لما كنت بسافر القاهرة عشان ادرس
واسيب اهلى وبلدى كنت بشتاق ليهم جدا
ومكنتش بفوت اجازة الا وانا ولازم انزل
اشوفهم واطمن عليهم


انا اللى خلانى انضم للجيش هو نفس اللى خلاك تنضم للمقاومة يا معتز البلد دى بلدنا وهنحررها
ومقيش قوة على وجه الارض هتمنعنا ناخد حقنا ونسترد ارضنا





معتز/


الله يبارك فيك والله يااخى احنا ما نعتبركم مصريين من ها
اللحظة اللى شاركتونا فيها المقاومة احنا بنعتبركم اهلنا واخواتنا ومن دمنا ... يلا يا دكتور الشباب هيخلصوا لحم الخروف














(((((((((وينضم احمد الى الجمع
ليشاركهم الطعام)))))))))














معتز/ جميلة جميلة وينك يا بنتى من الصبح احنا بنسال عنك
ليش ما قلتى انك هتغيبى





جميلة / الاول اعزم عليا يا خيى والله ما كلت شى من امبارح





معتز/ ما تحتاجى عزومة يا جميلة احنا
كلنا ضيوف عندك هون فى بيتك


جميلة / لا والله ما ضيوف انتم اهل
وما لى فى ها الدنيا غيركم ... احمد بعد
اذنك اريدك فى شئ





احمد/ بعد اذنكم


معتز/ اتفضل يا اخى











ثم تركب جميلة سيارتها ومعها احمد
ويتجهوا نحو مبنى قديم متهالك وتقف امامه
وتنظر لاحمد وتقول له تدرى اش هاذا ؟








احمد/


معنديش فكرة ... كان مبنى ايه ده
شكله كان مخزن ؟








جميلة /


احمد بدى احكيك عن شئ بس انت وحدك
اللى تعرفه ما حدا يعرفه غيرك وهادا سر
بناتنا لا يعلمه غير الله





احمد/


من غير ما تقولى ايه الحكاية








جميلة /


هادا المبنى كان مخبز قديم لاهل
غزة وتم قذفه فى 48 ومن ها السنة لها
اللحظة وهو مهجور





احمد/


كملى ايه اللى حصل بعد كدة





جميلة /


جدى وابوى الله يرحمهم كانوا مسؤولين فى الحركة على حفظ
مخطوطات مهمة وسرية جدا تشير لبعض اماكن السلاح
وبعض اماكن الخنادق تحت الارض حتى عقود ملكية لكثير من الناس لاراضيها وعشان يخبى المخطوطات دى ملقاش مكان امن غير
هاد البنى حفر هو وجدى تحت ارض ها المبنى
وحفظ المخوطات








احمد/


وهو انتى شايفة انه المبنى ده مكان
امن عشان يخبوا فيه حاجات زى دى





جميلة /


وعشان كدة انا قلتلك ياحمد على السر
عشان تساعدنى نطلع المخطوطات دى ونخبيها وخصوصا ان انا سمعت اليهود عرفوا الخبر
والان بيجندوا عناصر فى المقاومة خونة ليهم
عشان يدوروا على المخطوطات دى








احمد/


طيب ارجعى بينا تانى من فضلك يا
جميلة انا لازم اكون فى الكتيبة الساعة 7
بالدقيقة





جميلة /


ايه يا سيادة البكباشى هتتخلى عنى





احمد/


جميلة انتى عارفة انى مش قائد عسكرى
انا طبيب بعمل فى القوات المسلحة برتبة بكباشى
يعنى مملكش اعمل حاجة ليكى وبعدين
انا مش ناقص كفاية اللى انا فيه قوليلى لو احنا طلعناهم هنخبيهم فين .. فين المكان الامن اللى ممكن تخبيهم فيه .. انتى
فاكرة ان انا واثق فى جماعتكم وفى جميع الاخوة ... بصى انا مبثقش فى نفسى


والشئ الوحيد اللى طلعت بيه من حياتى
انى مثقش فى حد ولا اسلم قلبى وعقلى لحد








جميلة /


احمد انت هتخلينى اندم انى قلتلك..... انا كنت شيفاك بصورة تانية خالص كنت فاكرة انك هتقف جمبنا ومش هتتخلى عننا لكن فعلا واضح انك مبقتش عاوز تفضل معانا .. عموما حاضر يا سيادة البكباشى انا مش هعطلك
على شغلك


وشاكرة جدا ليك انك صححتلى الصورة
اللى كانت غلط جوايا ليك








احمد/


بصى انا الكلام ده مبياثرش فيا ولا هيحرك منى شعرة .. انا
ليا تفكيرى وليا نظامى بمشى بيه ومحبش حد يفرض عليا صورة هو راسمها ليا فى
عقله ... ممكن تكون الصورة دى هو
فاكرها انها صح او غلط


اتفضلى اطلعى يا جميلة








جميلة /


حاضر يا سيادة البكباشى











وعند منزل جميلة تقف سيارتها ويخرج
منها الاثنان وعلى وجوهما علامات عدم
الرضا مما اثار التعجب من نفوس الاخوة








معتز/


ايش اللى حصل يا احمد ... مالك يا
جميلة .... انتى كنتى عايزة الدكتور ليه وفى ايه .. ايش يا شباب ليش ما حدا يرد على








جميلة /


ما حصل شئ يا معتز الدكتور بس مستعجل
عشان لازم يكون فى كتيبته دلوقتى














ثم ياخذ احمد سيارته الجيب ويتجه نحو كتيبته




















وفى عيادات الكتيبة





دكتور يا دكتور ايه اللى اخرك كدة يا دكتور





احمد/


ايه يا عبده فيه ايه مالك ؟





عبده/


يا فندم الملك عبدالله ملك الاردن انضرب
النهاردة وهو بيصلى صلاة الجمعة فى المسجد الاقصى والدنيا مقلوبة ومصر اعلنت الحداد لمدة شهر





احمد/


ايه الكلام اللى انت بتقوله ده انت متاكد من الخبر ده





عبده/


ايوة يا فندم هفتح لمعاليك الراديوا











( هذا وقد اعلن الملك فاروق الحداد
الرسمى لمدة شهر حدادا على الملك عبدالله ملك الاردن الذى لقى حتفه بعد ان ادى
صلاة الجمعة بالمسجد الاقصى بالقدس الشريف بيد رجل فلسطينى طعنه بسكين عدة طعنات..... هنا القاهرة )





احمد/


اقفل الزفت ده هو احنا ناقصين....... دلوقتى الاردن تسحب قواتها فى الضفة الغربية
وتشيل ايدها من القضية الفلسطينة وميفضلش غيرنا احنا اللى قدام اليهود فى غزة ويفوقوا لينا
انا مش فاهم ايه اللى بيحصل ده وايه اللى بيعملوه الفلسطينين فى نفسهم
ده الراجل كتر خيره يعمل اكتر من كدة
ايه حمى ارضهم وضمها لادارة الاردن وبيدافع
عنها ضد اليهود وجه صلى فى المسجد الاقصى
عشان يقول للعالم ان الارض دى ارضنا يكون
ده جزاته تكون دى نهايته











د_امير /


ايه يا سيادة البكباشى انت مع الفلسطينين ولا ضدهم مش بدل ما تقول يا اخى ان اللى عمل ده خاين او
عميل لليهود عاوز يوقعنا فى بعض ليه ميكنش ده عمل مدبر من اليهود عشان يخلوا الجيش الاردنى ينسحب من الضفة والجيش المصرى يقلق انه هيفضل وحيد فى غزة ويبدا يوقع الدنيا فى بعضها











احمد/


يا دكتور انت مش شايف ان اللى بيحصل
ده زيادة اوى عن اللزوم مش شايف ان الفلسطينين بيبيعوا ارضهم لليهود كل
يوم يبنوا عليها مستوطنات مش شايف ازاى بنبقى موجودين فى مكان وفى دقايق
تلاقى الضرب علينا شغال مش شايف ان احنا
خسرنا كتير من بداية اعلان الامم المتحدة ادارة مصر لغزة مش شايف ان احنا مكناش
اصلا بنحارب فى 48 وان احنا كنا بنقتل فى
بعض وان عددنا احنا جيوش 7 دول عربية كان
اقل من عدد عصابات اليهود ... اسمحلى اقلك
يا دكتور الوضع مش تمام ومش سليم وكل حاجة غلط فى غلط








د_ امير/


احمد احنا هنا بنحارب مش عشان بس عروبتنا لا
... احنا هنا بنحارب عشان اقصانا
عشان ارضنا المقدسة عشان اهلنا
واخواتنا واظن انك جيت هنا وانضميت
بارادتك عشان كدة ومحدش اجبرك على حاجة ومع ذلك تقدر تكتب للقيادة فى مصر ترجع تانى
وتاكد انهم هيسمحولك بالرجوع
وخصوصا انك محبوب اوى ومسنود من
القيادة








((((((((( فينظر اليه احمد نظره كلها
غضب ويذهب الى مكتبه ))))))))


ثم يسمع صافرات سيارات الاسعاف وتصبح
العيادات فى حالة من العشوائية وعدم
النظام





دكتور يا دكتور جالنا 10 مصابين فلسطينين فى حالة خطر من فضلك
يا دكتور اعمل حاجة








احمد/


جهز اوضة العمليات الفرعية وفضى
الاوض التانية وجهزها فى اسرع وقت





ثم ينادى على عبده ويامره بان يتصل بالدكتورة فريده ويخبرها ان تاتى فى اسرع وقت ممكن








ويتجه احمد فى اسرع وقت للحجرة التى
بها المصابين ليفحصهم ومن ثم يكتشف ان المصابين هم جماعة المقاومة التى كان
معها من
عدة ساعات ومن بينهم جميلة ومعتز





احمد/


جميلة جميلة ..معتز معتز وتتعالى صرخاته ثم ينظر الى جميلة نظرة الاسف.. اسف يا
جميلة اسف على كل كلمة قلتهالك اسف على
نفسى وعلى حالى ثم سال من عينيه انهار من الدموع عندما اكتشف انها قد فارقت الحياة
وانه لم يستطع ان يقدم لها شئ وانه طيل الفترة التى قضاها معها
احبها ولم يصارحها بحبه لمجرد تعاليه وتكبره فى حبه وان الزمن قد سرق من بين يديه.............. ثم قام يودعهم ويتلو عليهم تراتيل السلام وفاتحة الكتاب ومازالت
الدموع تسكن عينيه حتى وهو واقف امام قبرها يدعوا لها بالرحمة ويوعدها
بالانتقام وانه سينفذ لها طلبها التى طلبته منه قبل استشهادها

















ادخل يا احمد ...................
ايه اللى انا قراته ده .... انت عاوز تسيبنا واحنا فى الظروف دى وترجع مصر ؟








احمد/


اكون شاكر لمعاليك يا فندم لو تدينى
فترة استريح فيها وابدا فى اعادة حساباتى
عشان اكون قادر على المقاومة.................. يا فندم داخل جسد كل انسان
منا مناعة ومقاومة لو فضلت شغالة
تحت ضغط هتضعف وممكن تموت.......
بعد اذنك يا فندم انا محتاج الاجازة دى جدا











القائد/


طيب يا احمد هحققلك طلبك رغم انك من
اكفأ الدكاترة معانا هنا وكنا فى امس الحاجة ليك
لكن هديك فترة ترتاح فيها ...
وترجع تانى تؤدى دورك فى معركتنا ضد اليهود
..... يصدق على اجازة لمدة 7 ايام يتم بعدها الرجوع الى القاعدة داخل غزة
فى مدة لا تجاوز الـ 24 ساعة بعد انتهاء الاجازة








اتفضل يا احمد














احمد/


شكرا جدااا يا فندم ....... تسمحلى بالانصراف ؟








القائد/


اتفضل





وبدا احمد يتجه نحو الباب وهو يفكر
فى عودته لحضن بلده ووطنة مصر ثم يقتطع تفكيره
نداء القائد له











القائد/


احمد








..................





فينظر له احمد وفى عينيه علامات
التعجب والخوف من ان يتراجع القائد عن الاجازة !!!!!!!!!!!!!








احمد/


تمام يا فندم ... اؤمرنى معاليك











القائد/


سلملى على مصر يا احمد تروح وترجع بالسلامة يا بطل








فيبتسم احمد ويشعر وكانه يريد ان
يطير فى السماء بعد ان احس من كلام القائد انه هو ايضا فى شوق لمصر هذا الشوق الذى
حرك احمد سريعا نحو السيارة التى ستاخذه هو وكل من سياخذ اجازة
من ضمن القوات المصرية فى غزة











ثم اخذوا جميعا
طائرة هليكوبتر لمطار العريش
العسكرى








وهناك حضن احمد تراب مصر وكانه تركها
عشرات السنين بل الدهر كله ثم اقسم ان يعيش محافظا على تراب هذا الوطن حاميا لها
عاشقا لجمالها مالكا لعفتها ساهرا لراحتها












يدخل احمد حارته وهو مبتسم ليجتمع حوله اهل بلده حاملينه على الاكتاف
مهللين لبطلهم الذى رفع راسهم مرددين عاش البطل عاش البطل





فتخرج ام احمد من شرفة منزلها مسرعة
لترى ابنها البطل محمولا على الاكتاف
والجميع يهتف باسمه فتذهب مسرعة لتفتح باب
شقتها وتنزل على السلالم وفى اللحظة التى يهرول احمد ايضا نحو المنزل
ليحتضن امه ذاك الحضن الذى لن يجد له مثيلا بين امهات العالم كله فى هذه اللحظة
تتعلثم ام احمد على السلم فتقع منه مصطدمة
راسها تدرج درجاته لتصل بين يدى احمد وقد فارقت الحياة والدموع قد ملأ
وجهها








ويصاب احمد بحالة من الجنون العقلى
وعدم الاحساس بالواقع وكانه يريد ان يقنع نفسه انه يحلم وليست هذه الحقيقة


ليست هذه امه ليست هذه دماؤها بل ليس هو نفسه احمد بل ان العالم كله ليس موجودا ليستيقظ فى جزء من الثانية ويحتضن امه صارخا باعلى صوت امى
بالله عليكى يا امى لا لا يامى
بالله عليكى لا تتركينى امى قولى انكى لم تموتى امى
قولى لى انك ما زلت حية امى افتحى
عينيكى انظرى لى فقد جئت لاراكى جئت لاخذ منك جرعة من حنانك لاشعر معك انى طفلا صغيرا يلعب امام
عينيكى امى امى ان متى فقد انتهى العالم
بالنسبة لى ولن اتركك تذهبى وحدك بل ساموت
معك....... امى امى








وساد المكان حالة من السكون لبضعة
لحظات ولا تسمع سوى بكاء احمد وابيه وصراخ
اخته لتنتهى بهذا المشهد الماساوى كل امل
احمد فى الحياة





وبعد ان انتهى العزاء لم ينتظر احمد
لتنتهى الــ7 ايام التى قد اخذها واخذ اقرب طائرة عسكرية الى وحدته فى فلسطين

شكرا موندى على القصه الجميله

تقبل مرورى

اشكرك مرورك اخى العزيز على قلبى

الاب الروحى


شكرا يا محمد

اطلق العنان

واخرج ما في داخل

واظهر للعالم

بكل ما اوتيت من قوه

وانا معك وكمان الكل

تمنياتي لك بالتوفيق والنجاح


تحياتي
بيان

تطرح علينا افكار جميلة فلماذا تتوقف يكفي انها من قلمك وليست منقولة


فلا تفعل كما فعلت بالاولي تطرح فكرة ثم تهمل الموضوع


منتظرين اجزائها التالية

بيان كتب:

اطلق العنان

واخرج ما في داخل

واظهر للعالم

بكل ما اوتيت من قوه

وانا معك وكمان الكل

تمنياتي لك بالتوفيق والنجاح


تحياتي
بيان

اشكرك من كل قلبى بيان على الكلام الجميل جدا والمشجع
كلك ذوق

اجمل احساس كتب:

تطرح علينا افكار جميلة فلماذا تتوقف يكفي انها من قلمك وليست منقولة


فلا تفعل كما فعلت بالاولي تطرح فكرة ثم تهمل الموضوع


منتظرين اجزائها التالية

ان شاء الله يا اجمل اكتب اجزائها الجديدة وانزلها بس افوق ليها بشكرك على كلامك الجميل