اتج لام اخوه لان عيونه اهل عايض ك كانت متركزه على بقـعه معينه من السماء ، وبعد لحظة تركيز قصيره قال :
عايض : سالم .. اتشوف هاييلك الغيمه السوداء اللي تتحرك بسرعه في السماء.
حـرك سالم بصره صوبها ليما شاف فعلا غيمه سوداء نازله شويـة على الارض ، فتساءل بدهشه :
سالم : شو فيها ؟!
جاوبه عايض بهدوء :
عايض : انته ملاحظ ان برودة الجــو زادت وايد بعد المطر .
هـز سالم كتوفه وقال ببساطه :
سالم : شي طبيعي اتـزيـد البروده بعــد نزول المطر .
رد عليه عايـض بنفس الهدوء وهـو يطالع مؤشر الحرارة الالكتروني في سيارته :
عايض : شي طبيعي فعلا .. لكن درجة الحراره وايد نزلت .. كانت 25 قبل نزول المطـر والحينه قربت من العشر درجات ، وبعدين لو اتلاحـظ .. الغيوم زاد عددها وكثافتها بشكل مب طبيعي .
قطع سالم كلامه وهـو يسأل بفضول :
سالم : شو قصـدك يعني ؟!
وضــع عايض يـده على خـده وهـو يجاوب :
عايض : اقصــد ان حبـات البــرد ممكن تنزل بعد شويه على ها المنطقـة .. لان انخفاض الحراره بها الشكل وكثافة الغيوم ممكن اتسبب نزولها .. فهمت .
هـز راسه بتفهم وقال :
سالم : هيه .. فهمت ..
سكت سالم لحظه ثم تابع :
سالم : و الحينه.. شو ناوي اتسوي ؟! .. بتم واقف جذيه ؟! .
هــز عايض راسه بالنفي وقال :
عايض : لا طبعـا .. بتحرك الحينه .. هذي مـب اول مره انشوف فيها البرد .
ضغط عايض فعلا على دواسة البترول ، واتحركت السياره بهدوء على الشارع الرئيسي في طريقها لمنطقة ( الظاهر ) .
وفجأه .. وبعـد ما اتحركت لامتار بسيطه بس .. ضغط عايض على بريك او فرامل السياره بكل قوته ليما وقفــت السياره وارتــزت في مكانها .
وانفتحت عيون عايض وسالم على الآخـر من فرط الدهشه والعجب .
لان المنظــر اللي وقـع عليه أبصارهم في ها اللحظه كان مذهل ..
مذهــل وعجيب ..
منظر.. ما سبق الهم رؤيته على الطبيعه في سابق حياتهم ..
ابدا ابدا ..
************************************************** ****
************************************************** *
كان المنظـر فعلا مذهل .. ففي الوقت اللي اتوقعوا فيه سقوط حبات من البرد على اقصى تقدير .. اتفاجأوا بسقوط كرات صغيره من الثلـج الناعم الأبيض ، تماما مثل الثلج اللي كانوا يشوفونه في التلفزيون واللي ما يسقـط الا في البلاد البارده او المناطق الجبليه العالية .
ولدقايق طويلـة.. ظلت العيون مفتوحه من فرط الذهول والدهشه ، وظهـر الناس من البيوت عشان يشوفون ها الظاهر الغريبه اللي ما شهدوا مثيل لها في حياتهم من قبل .. على الاقل في منطقتهم الصحراويه هذي !! .
كانت كرات الثلوج الناعمـة تتساقط بنعومــة في وســط الصحراء .. ورغـم ان بعض الصحاري في بعض دول العالم تشهد احيانا هذي الظاهره ، لكن المنظر في هذي المنطقة الصحراويه التابعه للعين كان عجيب ونادر ومبهـت للنظــر ** (( حادثـة حقيقيـة حيث تساقطت الثلوج بإحدى ضواحي مدينة العين في منتصف الثمانيات )) **
اتجــمد عايض واخوه سالم في مكانهم ، وما قدروا ينطقون ولا يتحركون من مكانهم من كثر الدهشه والانبهار من روعــة هذا المنظر الرهيب ..
وفي الشوارع .. كانت حركة الاهالي واضحه ومستمره وهـم مبتهجين ومنبهرين من جمال هذا المنظر اللي تنظر لــه عيونهم . .
واخيرا.. وبعد دقايق صمت طويله .. التفـت سالم لعايض وقال والدهشه تتقاطر من فمـه :
سالم : شو هذا ! .. هذا ثــلج حقيقي .. احنا عايشين في العين ولا موسكو ؟!
ما كانت دهشة عايض بأقل من سالم لما قال :
عايض : انا ليــن الحينه ما مصــدق .. ثلـوج بوســط الصحراء ؟!
رجـعوا ببصرهـم مره ثانيه صــوب الشارع ، ومــرت دقايق صمت ثانيــه وهــم يتابعون تساقط كرات الثلج الرقيـقه على زجــاج سيارتهم ، واستمر تساقط الثلــج لمــدة زادت عـن خمس واربعين دقيقه كامــله في منظـر جميل ما ينوصف من كثر ما هو رائــع .
بعد مرور الدقايق الخمس والاربعين .. اتوقف سقوط الثلـج نهائيا ، وبدت الغيوم تنـزاح وتنقشــع من السماء بسرعه عجيبه ، وعــاد الجو للصفاء مره ثانيه ، ولحظتها قال سالم بصوت خافت :
سالم : الجــو بدا يتعدل .
هــز عايض راسه وقال :
عايض : هيه .. الغيوم بدت اتــروح والسماء قاعده تتكشف من وراها .
ضرب سالم على كتف اخوه وقال :
سالم : يا الله عيــل .. اتحرك .. خلنا نرجـع العين .
عقـد عايض حواجبه وهـو يقول :
عايض : خلنـا نتريا شويه .. الارض مليانه ثلـج .
القـى سالم نظره سريعه على الارض وقال :
سالم : ما عليك .. طبقة الثلج خفيفه وما بتعثر حركة السياره .
اتحرك عايض ببطء على الشارع المليان ثـلج ، وبدت السيارة تقطع الشارع ليما وصلت للشارع الخارجي ، ولحظتها .. اختفى الثلج الابيض من الشارع نهائيا في اشاره واضحه الى أن الثلج ما سقط الا في منطقه محدده بس .. بداخل منطقـة ام غافــه .
ورغــم اختفاء الثلج نهائيا عـن انظارهم ، لكن عقولهم كانت شغاله وبكل طاقتها في محاولة مستميته وجادة لكشف أسباب سقوط الثلوج على هذي البقعه الصحراوية ، ولما عجـز عقلهم عن تفسير هذا ، التفت سالم لاخوه عايض وقال بصوت خافت :
سالم : عايض .. عندك تفسير مقنــع للي شفناه قبل شويه ؟!
هـز عايض راسه بالنفي وردد :
عايض : ابدا .. طول ما كان الثلج ينزل كنت أفكــر ، لكني ما توصلت لنتيجه مقنعـة .
وضــع سالم يـده على ذقنـه وسرح بموجه ثانيه من التفكير قبل لا يحول بصره مره ثانيه صوب اخوه ويقول بحماس :
سالم : عايض .. ليش ما تتصل برفيجك فارس الي يشتغل في الارصاد الجويه وتسأله ؟! .. أكيـد عنده علم وتفسير معقول لهذي الظاهره .
ما كذب عايض خبر ، فرفــع سماعة التلفون ودق بسرعه على رقم رفيجه فارس ، وانتظر وقت طويل قبل لا يرد عليه فارس ويقول :
فارس : الـو .
ارتفع صوت عايض وهـو يقول بلهفه :
عايض : السلام عليك فارس .
رد عليه فارس بسـرعه :
فارس : وعليكم السلام .. اشحالك عايض .
جاوبه بلهجـة ترحيب :
عايض : بخير الحمدالله . اشحالك انته .
جاوبه باختصار.
فارس : الحمدالله .
انفعــل عايض وهــو يســأل :
عايض : فارس .. دريت باللي صار بأم غافه قبل شويه .
ارتفع صوت فارس وهـو يجاوب :
فارس : هيه.. دريت .. وقبل شويه اتصلت فينا جريدة الاتحاد عشان نعطيهم تفسير لسبب سقوط الثلوج على هذي المنطقه الصحراوية .
وبلهفـه متزايده سأله :
عايض : وشـو السبب .
التــقط فارس نفس قصير ثــم قال بصوت متقطع :
فارس : التفسير الي عطيناهم اياه ، هــو تعرض المنطقه لتيار من الرياح الثلجية البارده القادمــة من جبال الألب ، واتصادف ان الرياح هذي التقــت مع جبهه بارده ثانيه قادمــة من شمال آسيا ( سيبيريا ) فســقط الثلج على هذي المنطقة الصحراويه ، وخبرناهم ان الظاهره هذي نادرة الحدوث جدا .
هــز عايض راسه بتفهم واقتناع ، وكان على وشك انه ينهي المكالمة مع فارس لكن فارس تابع كلامه بصوت متوتر وقال :
فارس : هذا هـو التفسير اللي قدمناه للصحافه .. لكن ..
جذبت كلمته الاخيره اهتمام عايض فسأله بفضول :
عايض : لكــن شوه ؟!
اتردد فارس وايد قبل لا يقول بصوت خافت :
فارس: فيه اشياء وظواهر غريبه سبقت سقوط الثلوج على ام غافه .. اشياء غريبه وايد .. ما شفت مثلها من قبل .
اتساءل عايض بكل فضول وهـو يلوح بيده اليسرى :
عايض : شو قصـدك ؟!.
صمــت فارس لحظات طويلــه قبل لا يقول بحيره شديده :
فارس : كتلـة السحب او الغيوم اللي مرت على ( ام غافــه ) سـبق وان مرت على مناطق ثانيه قبلها .. صحيح انها كانت مشبعـة ومحمله بالماي ونزلت امطار على اماكن ثانيه قبل لا توصل العين واتفرغ باقي حمولتها ، لكن اول ما عـدت وخطفت ها الغيوم على مدينة العين ، صارفيها تكاثف شديد ما شفنا لـه مثيل من قبل ، وزادت نسبة بخار الماي في الغيوم مره ونص على الاقـل ، ولها السبب سقطت امطار غزيره جدا على منطقة ام غافه و ..
قطـع عايض كلامه لما سأل :
عايض : والثلوج ! شـو سبب نزولها هناك ؟!
عاجــله فارس بجوابه سريع :
فارس : بعد ما نـزلت الامطار الغزيره على أم غافــه ، صارت ظاهره أغرب وأعجـب من ظاهرة التكاثف اللي قبل ، فأثنــاء ما كان المــطر ينزل انخفـضت درجة الحراره في طبقه عاليه من الجو بشكل مفاجي وسريع جدا وغير طبيعي بالمره ، ومن شدة انخفاض درجة الحراره في هذي الطبقه العاليه من الجــو ، اتحولت قطـرات الماي لبلورات من الثلـج الناعم واتساقطت على الشكل اللي صار في هـذي المنطــقة .
عقـد عايض حواجبه وهو يتابع اسألته :
عايض : يعني التكاثف الشديد وانخفاض درجة الحراره ما كان طبيعي .
جاوبه فارس بكل ثقــه :
فارس : هيه نعم .. ما كان طبيعي ابدا ابدا ؟!
فتــح عايض عيونه من الدهشه ، ثـم حول بصره صوب سالم اللي قرأ في عيون عايض جبال من الدهشه والعجــب ..
ولكــن .. ما كان عنــد عايض ولا سالم ولا حتى فارس تفسير واحـد لسبب هذي الاحداث الغريبه والعجيبه اللي صارت في هذي المنطقة ..
واللي سببت تساقـط هذي الثلوج .. بوسط الصحراء ..